البساطــة مطلــوبة .

دايماً البـنى أدم بيتعرض لأوقات ضعف وكسرة نفس وضيـق وحزن بدون سبـب ومن غـير مايحس بيلاقى نفسه بينجذب أتجاه الحالة دى وبيعيـش فيهـا زى ماتكون عيب خُلقى أتولد بيه وقدره إنه يكمل بيه ! . الحالة دى صعب ماتكونش موجودة فى أى بنى أدم على وجه الارض والاصعب إنك تكتشف لها سبب معـين ملموس تقدر من خلاله توصل لحل يشفى الناس ويبعدها عن الحالة دى .

الفكـرة إنى دايماً بتجيلى الحـالة دى وببقى فى منتهى الضيق لإنى مش متعودة أدخل مكان مثلاً وألاقى أى حد بتعامل معاه فيه يقول لى " مال حضرتك مضايقة ليه !"ودة حصل لى كذا مرة فى حياتى . مش دة المهم ؛ المهم إنى فكرت انا ليه بوصل نفسى للحالة دى وليه بحس براحة غريبة لما أعلن مثلاً إنى فى حالة اكتئاب فظيع . هو أكيد فى سبب . التفكيـر ده مش أبن النهاردة ولا أمبارح انا يمكن بقالى أكتر من سنتين بفكر وبسأل نفسى كل يوم لـيه انا وغـيرى بنوصل للحالة دى ؟! انا وصلت للإجابة اللى ترضينى وتريحنى وعشان كده عايزة اشرحها يمكن تريح أى حد بيمر بالحالة دى كتـير.

ســر راحــة الــبنــى أدم هى : الــــســـعــادة !

طبعاً كل الناس هتقول لى ماهى دى مش حاجة جديدة ولا انا اكتشفت اكتشاف رهيب يـعنى ؛ انا ردى هيـكون إن السعــادة فى الدنـيا مفهومة غلـط جداً ! وده اللى بيوصلنا لحالة من الحزن الـ لا أرادى .. وعشان اشرح الاجابة لازم قبلها اشرح معنى وتعريف السعادة فى وجهة نظرى ..

أعتقد إن فى نـاس كتــير جداً سمعت أغنيـة إنسان لـ حمزة نمرة ؛ حد ركز وتعمق فى الكلمات دى

يـضحك يضحـك خلق الله يـفرح يفرح كله معاه

اللى معاه على طول مش ليه ولا حتى روحه ملك إيديه

الكلمات دى لخصت معنى السعادة اللى دايماً هتحمينا مش شر حالات الحزن . السـر عمره ماكان فى إن حد يـعملك حاجة تفرحك ولا إنك تستنى حد يسأل عليـك ولا أى حاجة من النوع دة , السعادة اللى بجد بتخرجنى بسرعة من حالة الحزن والضيق لـما ألاقى نفسـى مـابخسرش حد فى همى بالخناق والزعل والبعد والغلط فى بعض الاحيان , بلاقى نفسى عايزة أكتر وأعلى صوت الضحكة وسط الناس فى وقت الضيق ؛ انا اللى بجرى ودور على الفرحة وبخليها موجودة حوليا بنفسى زى إنى دايما بضحك وبلعب وبهزر مع أى بنى أدم اعرفه وببتسم واتعامل مع اى حد معرفوش بمحبة . السعادة موجودة فى حاجات بسيطة جداً وأسهل جداً من ما أحنا متصورينها .

أهم حاجة فى وقت الضيق ده إنك تعرف ترفع نفسك وتوصلها لمرحلة الضحك والهزار واللعب ؛ حتى إن كنت هتضغط على نفسك وتكتم الحزن بـإنك قصاد الناس بتتضحك مش لازم عشان تخرج من الهم تنشره وتقول انا زعلان .. الناس لما بيلاقوا حد بيضحك دايما وبيفرحهم دايماً بيبقو كلهم جنبه إذا حصل له اى حاجة ..

أهم حاجة إنك تعرف تتعامل مع مرحلة توصيل نفسك لخروج من الضيق ده لإن فى ناس كتير بتكتم جوها بشكل سلبى وفى الاخر بتخسر نفسها وبتخسر الناس .. أعرف أزاى تكـــسب نــفســك ومـا تخــســرش الناس. عشان إن خسرت نفسك هتعيـش حالة أسوأ من حالة الحزن نفسها مش هتعرف تعـمل أى حاجة فى الحــياة من غــير التفاهم مع النفس وإن خسرت الناس فـ ده جزء كبير من خسارتك للدنـيا لإنك عمرك ماهتعرف تعيـش فى الدنيا لوحدك ولإن الدنيا تعاملات فاتخيل نفسك بتتعامل ما ناس انت أصلاً خسرتهم .

السـعادة مش محتاجة عوامل خارجية .. السعادة جواك انت مش جوه حد تانى ولا حد تانى هيدهالك ولا هتقدر تنتظرها أبداً ومن غـير ماتعرف معنها الحقيقى مش هتعرف تخرج نفسك من أى حالة حزن غير مبررة , االمشكلة إن الكل بيعقد الدنيا والدنيـا أسهل من كده بكتير .. الدنيا المفروض تبقى مش فى نظرى بس لأ فى نظر الكل معنها ابتسامة والابتسامة يعنى الســعـــادة .

وأخيــراً لو حد يلاحظ إعلانات كوكا كولا كلها بتتدعى للسعـادة وتحاول تنشرها وانا اصبح من أحلامى إنى اشتغل فى كوكا كولا عشان الناس دى فاهمة ومقدرة جداً معنى السعادة الصح ووصلت له وبتحاول توصله لكل الناس

والسعادة عمرها ماكنت احتكار .. يعنى لما تفهم الفرح لازم تفهمه وتنشره للى حوليك بأى وسيلة تقدر بيها علشان الناس توصل لها , لإن الســعادة لا تمنح !

http://www.youtube.com/watch?v=4Omj0prQPRI

:)))

Haya Hassan

24-07-011'

2:49am

ماتزعليــش

ماتزعليــش

ماتزعليش كونك انتِ

ولا تيأسي كونهم عليكِ

اسمعى نبرة سكوتك

وفرحى وداري صوتك

الكلام يشمت عدوك

والسؤال علــ باعك

علــ انبسط بخداعك

راح اكيد يثبت لــهم

ضعـــف أمتنــاعــك

اسرحى...

اسرحى وحبى نفسك

واعشقى ضحكة جمالك

وامرحى جوه فى خيالك

وأضحكِ كونك عزيزة

توجى معنى الكرامة

وكونى انت العفية

كونى الشقية السامية

اللى هى ...

عيـّلة شايلة القاسية

من دنيا كانت عاتية

سجنت عينها الدموع

وانينها كان مسموع

لعبها وياه العيال ممنوع

وشجونها زى الادب مسجوع

اتعلمى تكونى صورة

بكل الالوان مرسومة

ولا تسألى ليه مهمومة

احمدى ربك واستغفرى

صلى وغنى واحلامى

وابدعى بـ كل اللغات

وعّرفى معنى السُكات

وماتزعليش كونك انتِ :)

هيـا حســن

المحظورات !

كل بنى أدم له قائمة محظورات وكل قائمة لها ثوابت مستحيل إنها تتغير أو إنه يقرب منها ويحاول ينفذها . وطلما احنا عايشين فى مجتمع واحد وعاداتنا وتقاليدنا واحدة وأسلوب الحياة مابيختلفش من واحد للتانى بدرجة كبيرة ولإن كل الاديان
بتدعو لحاجة واحدة والمحرمات فيها وعواقبها واحدة ؛ فا بالتالى الثوابت دى فى مجتمعنا مواحدة ومابتختلفش كتير أو مابتختلفش أصلاً فى قائمة مخظورات كل واحد فينا . أعتقد إنه اللى بيقرب من الاخطاء والمحظورات دى يـاأما هو إنسان غـير طبيعى
ياأما الشيطان تملك منه وجعل له الممنوع والمحظور مرغوب .لكـن فى حاجة تانيـة النـاس بتخلطها بالمحظورات دى وبتحاول تقنع نفسها بعدم فعل الحاجة دى لأنها بتقارنها بالمحظورات على الرغم من إنك مستحيل تعرف تعيش من غير ماتعملها ,
الحاجة دى بتحصل لكل واحد فينا بدون قصـد ؛ وهى الدروس اللى بنتعلمهامن الدنـيا واللى هى بترسم شخصية كل واحد فينا وبتبنى له مميزات وعيوب وبدون الدروس دى الدنيا لا لها قيمة ولا معنى ؛ وأعتقد إن الدروس دى بتتمثل فى الاخطاء وعمر
الاخطاء ماهتحدث دون وجود مواقف فـكل موقف بينتج عنه تجربة والتجربة دى هى اللى ممكن نطلق عليها كلمة درس فى الحياة .

ياترى بقى ينفع حد يعلمنا درس فى الحيـاة ؟ , أو يحاول بـخطأ هو أرتكبه يعلمنا حاجة فى الدنيا ؟
كـل الكلام اللى فات ده سأله عقلى لمـا كنت بحكى لشخص من فـترة إنى غلط فى حاجة حد حذرنى منها قبل كده ورد فعل الشخص ده أو نصحته ليا فعـلاً خلتنى أحط الموضوع فى دماغى من شهر فات . هو قالى جملة بسيطة وسكت .
لازم تــتعلمى من غـلط الغــــير !! فكرت كتير فى الجملة دى لدرجة إنى كنت بسترجع كل موقف حصل معايا فى الدنيا وكل حاجة اتعلمتها حد حذرنى منها قبل كدة ولا لأ شوفت حد غلط فيها قبل كدة ولا لأ . لكن فى النهاية توصلت
إن مش بالضرورى تكون نصيحة وكلام الشخص ده صح . لإن لو فعـلاً الواحد المفروض يتعلم من اخطاء غـيره ماكانش ربنا خلق له عقل منفصل عن غـيره واخطاء مختلفة وتجارب فى الدنيا مش متشابهة مع أخه أو صديقه . كانت الدنيا هتكون عبارة عن
واحد بينقل التانى كلام يعمله وبالتالى الاخرة مش هيكون فيها نار غــير لشخص واحد بس اللى هو غلط وعلم غـيره إنهم ميغلطوش نفـس الغلط .


عمرى ماسمعت إن فى حد اتأثر بتجربة حد لدرجة إنه اتعلم منها وتجنب كل حاجة حصلت للتانى فى حياته علشان هو بس حذره من إنه يعملها . البنى أدم عنده صفة أسمها الفضول مهما كنت شخصيته فـ لازم هتلاقى جزء فيها فيه فضول .
فضول إنه يعرف ويجرب ولو ماكانش الفضول ده موجود فى الطبيعة البشرية ماكناش وصلنا للدرجة دى من التقدم والاكتشافات العلمية الرهيبة فى العالم دلوقتى لإن كل أول حاجة بتبدأ مع البنى أدم بـ فضول اكتشاف ومعرفة الحاجة اللى قصاده . فـ عشان كده فضول البنى أدم بيخليه يغـلط ويجرب حاجات كتير غلط مع إن فى غيره مروا بنفس الغلط ده
بس مستحيل البنى أدم يتجنب الوجع إلا لما يكون مجربه بنفسه لإنه بيكون حس به وتعب من ألمه وأثر فى حياته ولأن فى ناس كتـير بتهول موضوع تافة وناس بتسخر من موضوع مهم ! فلازم البنى أدم يجرب وياتصــيب يـاتخيب .




لكن أعتقد إن مافيش بنى أدم بيغلط بتخيب معاه الدنيا لإنه بيخرج من التجربة بدرس حتى إذا كان بسيط بس بيفرق معاه وبالغلط أحيانا كتير بنميز ونعلم على الصح من الغلط وأفتكروا ديـماً إن سيدنا أدم لو ماكنش غـلط مـاكانش اكتشف
الدنيا , وماكانش اتعلم .كل بنى أدم فينا لازم يغلط عشان يتعلم وصعب كده إن حد يتعلم من غلط غيره لإنها مش هتأثر فى حياته بقدر ما تجربته هتأثر فيه . أنصحك ماتصدقش حد يقولك انت عمرك ماهتتعلم من غـيرك علشان كده هتفضل ديما
تخسر نفسك والدنيا لكن صدق أى حد يقولك اتعلم من غلطاتك وتجاربك السلبية اللى مريت بيها فى حيـــاتك

ضحكة رضا

هو ليه كل ما الواحد بيكبر يوم بيحس إنه فقد حاجة اكتر واكبر من اللى فقدها فى اليوم اللى قبله. مش شرط يكون عارف إيه هى الحاجة دى لكن هو واثق إنه فقد حاجة , اياًكان بقى احساس , شخص او شئ . المهم إن الاحساس ده احساس بشع . دايمـاً بيخليك مُحبط وزهقان ومضايق وقرفان , عاوز تغـير وتتتغير والابشع إنك عايز تدور على الحاجة اللى ضاعت وتستردها اياكانت فين او مع مين او تمنها إيه مع إنك مش عارف إيه هى !!

بس لولا احساس الفقدان ده ماكناش اكتشفنا حاجة جديدة واتعلمنها او شخص جديد وحبناه او شئ امتلكناه وبنحاول نحافظ عليه ولا حتى احساس جديد اول مرة نتحس بيه ونفضل عايزين نحسه واتغيرت الدنيا بحالها عشانه والاهم بقى إننا نكتشف نعم ربنا علينا وحبه لينا ورحمته بينا ؛إنه بيعوضنا الحاجة اللى بنفقدها بحاجات احسن واقيم واضعاف اضعاف احلامنا , بنحس ان ربنا شايفنا وحاسس بينا وإنه معانا فى ضراء قبل السراء . ودايما بيسبب لنا الاسباب عشان ندور على الحاجة الاحسن بس إحنا نفكر ونرضيه !

زى بظبط الاخطاء والمعاصى اللى بنعملها اللى بعدها بتنقى الواحد و تولده من جديد وبتخليه مش عايز يرجع لها تانى ومن غير الحاجات دى لا كنا عمرنا هنتعلم الصح ولا كنا هنكبر ونكتشف الدنيا ولا كنا هنعرف ربنا اكتر ونحاول نرضيه وتقرب منه . :)

عشان كده الانسان اللى فقد حاجات كتير واللى حُرم من حاجات كتير واللى غلط كتير هو من يطلق عليه عاقل وواعى بااغلب الاشياء لإن مافيش حد واعى بنسبة ميه الميه . وهو ده الانسان اللى بيقدر يستحمل هم الدنيا وعارف معنى كلمة الحمد لله وإن شاء الله وعارف معنى الامل والحب والخير .

إن فقدت شئ ماتحزنش بص لاقدام واقتنع بالاسباب اللى ربنا سببهالك . حب حياتك واعمل لبكرة وطول مااحنا مؤمنين بوجود ربنا وبحبه لينا فـ بكرة فى الخير والنهاردة اتقضى بشره وخيره مش هيرجع ولا هترجع اى حاجة ضاعت فيه .

نفسـى بس ابص لكل الناس ألقيها بتضحك وتساعد بعض إنها تظهر الضحكة اللى بتخلينا مرتاحين ومبسوطين , و كلمة الحمد لله والابتسامة اللى فيها الاحساس بالرضا إياكان الهم والحزن اللى إحنا فيه . إحنا بنضحك لإننا واثقين بعدل ربنا وإنه بيقد ويفقد الواحد شئ عشان يعلمه او يعطيه الاهم والاحسن , ضحكة الرضا معنها كلمة الحمد لله وعشان الضحكة دى مش موجودة كتير , دايما حالنا لا بيفرحنا ولا بيفرح اللى حولينا!

ده مش كلام وخلاص ..

ده درس لسه فاهماه من كام يوم

ولولا انى عايزة اتعلم ماكنتش فهمته !

الحمد لله على السراء والضراء :)

صـورة ثابتة ..

نعم الله لا تعد ولا تحصى وكرمه لا نهاية له , ربنا خلق لنا كل حاجة سهلة وبسيطة وخلق برضو فينا كمية تناقضات وعقد عجيبة , يمكن " المشاعر والافكار والغرائز والنفوس البشرية وكل ما فيهم من تناقضات " هى سبب التعاسة واليأس أو الاحباط اللى بيمر بيه الانسان فى مراحل كتير فى حياته , الانسان اللى عاوز يكون فعلاً ناجح , التناقضات دى هى سر الانسان وهى سر رضا ربنا عليه إن أغلب تـصررفاته تـبقى لى الخير مش الشر مثلا !.

أنا لما قعدت أفكر فى فكرة " النسيان " وفكرة إنها نعمة من عنده أحترت ! , لإنى مش شـايفة حد بيـعرف ينـسى مـشكلة مر بيها ولا حدوتة حـب قديمة ولا علاقة صداقة فظيعة ولا أب قاسى ولا أم بعيـدة ولا أخ جاحد , إذا كـان سيدنا أدم ذات نفـسه مـانساش إنه اكل من الشجرة المحرمة اللى بيها نزل الارض ولا عمره نسـى إن حواء هى سبـب نزله الارض وخسرته للجنة, لـكن هو بعـقله ابـتدى يـفكر إزاى أقدر أبعد عن التفكـير وتأنيب الضمير إنى مـاسمعتش كلام ربنا ووصـل إنه يـعمل نـفسه مش فاكـر "تناسى " إنه راح بإيده اخد من الشجرة اللى ربنا حرمها عليه . وتـناسى إن حواء هى اللى وصلته للأرض وخسرته الجنة بدليـل إنه عرف يـعيـش ويـكمل حيـاته مـعها ! .

مين فينا بيقدر ينسى وفاه حد عزيز عليه ولا يقدر ينسى خيانة صديقه له ولا قدر ينسى إنه سرق قبل كده أو قتل . مين فينا يقدر ينسى ذنب عمله فى حياته , لو حد قال انا يبقى ده أول واحد بيكذب على نفسـه , لانك لو كنت نسيت كنت هتعيش مرتاح البال مابيجيش عليك اوقات تحس بالدمار النفسى والاحباط واليأس , ميـن فيـنا مـش هيزعل لو كبر وبدأ ينسى اشكال الناس اللى حواليه والمواقف الحلوة اللى مرت فى حياته مين فينا هيقدر يسـتحمل مرض زى مرض الزهايمر !! .

عمر مـاواحد عاقل نسـى ابدا أبسط الحاجات اللى حصلت فى يومه وعمره مانسى أمتى أبتسامته أترسمت على وشه ولا أمتى دمعته نزلت على خده ! إحنا شاطرين أوى إننا نعمل "عُبط " فـى المشاكل والاحداث المؤلمة علشـان الدنيـا التعدى واليوم يتقضى , لـكن عمرنا ما بنـنسى أبدا إى حاجة بـتأثر فيـنا حصـلت لـنا إحنا بـنحاول نـتناسى الحاجة دى علشان نعرف نعيش وده دور العقل اللى بيقولك أفتـكر ده وأنسـى ده النـهاردة علـشان انت فـرحان مــثلا !

انا ماعرفش إذا كـان موجود فـى القران الكريم مايدل على إن إن فـيه حاجة اسمها ننـسى أو نسـيان وإنها نـعمة , لكـن عارفة كويس جداً إن العقل نـعمة . بـس برضـو مش كل العقول " العقـل اللى بجد بيأدى وظفته " بـيفكر " هو اللى ممكن نقول عليه نعمـة . ومن هنـا انا مش هقدر أقول لحد بعد كده جملة النـسيان نـعمة لإنى مش مقتنعة بيـها ولا هقدر أكذب على نفـسى واقول هتنـنسى ده النـسيان نـعمة , أنا هحاول اتناسى واخلى اللى حوليا يتناسوا لكـن صعب نـنسى حاجة للأبد وهى أصلا محفورة جوانا .

التسامح والتصالح ومعرفة النـفس هى اكبر نـعمة ربـنا ممـكن يـوصلنا ليـها ولو قولت لنفسك أنا اقدر أنسى يبقى أنت بتـكذب على نفـسك ولا عمر هتنام يوم مرتاح ومتصالح مع نفسـك..

عجيبة يانفسى !

بسـيطة أقفلى الصوت ده وروحى هاتى ورقة وقلم واكتبى اللى هقولك عليه ده بالحرف من غير ماتفكرى فيه ولا تشوفى بتكتبى إيه , إيوة اقعدى هنا بقى واسمعى كويس واكتبى .




هـيا زهقانة مش لاقية حاجة تعملها , فـانزلت فيـلم كالعادة عشان يضيع لها على الاقل ساعة ونص من وقتها. بس المرة دى مانزلتش فيلم رعب ولا اكشن ولا كوميدى صريح , نزلت فيـلم رومانسى !!

هيا نزلت فيلم رومانسى ؟! بجد , إزاى طيب وهى على طول مقتنعة إن الافلام دى اى كلام , أصل انا هقول لكم هى عندها يقين إن كل كلام الحب والحياة العاطفية السعيدة جدا دى اللى بتشوفهم فى الافلام كلام هلس ومش مقتنة بيها خالص ؛ لإنها مش بتحصل فى الحقيقة ولو بتحصل فـانسبتها قليلة اوى جدا خالص .ولإنها مابتحبش حد يقرب من مشاعرها ولا يلعب بيها ولا إنه يعيشها فى حالة نفسية جميلة مؤقتة ( اصل هيا حساسة اوى وبتخاف على مشاعرها اوى وطبعا مافيش كتير هيصدقوا ده لإنها دايما بتخبى ) المهم إنها نزلت الفيلم وبعده وصل لها الاحساس ده !

كـانت عايزة تطير فى السما وتروح مكان تانى ؛ مكان موجود فى الحب والرومانسية اللى موجودة فعلاً فى الفليم ده , وكمان لو هى راحت مكان بعيد غير مألوف أكيد هتقابل ناس تانية بأخلاق وصفات وعادات وحياة كاملة مختلفة عن العالم الممل ده فـ قالت جايز تلاقى حد زى البطل ولإنها هناك فا هى هتكون شبه البطلة .

رغم كل الدوشة اللى حوليها عنيها قفلت وابتدت تحلم وتفكر وتتخيل , حلمت بكل حاجة هى مش لاقيها , خيالها ماكانش له إى حدود ولا إى مساحة , لاقت نفسها بتقابل الفارس الابيض اللى راكب على حصان ابيض اللى كل صحابها كانوا بيقولوها عليه وهى كانت بتقولهم بطلوا هزى !


الفكرة مش فى انها لاقيت الفارس ولا لاقت الحب العظيم الغير طبيعيى ( على حد كلامها ) فى الحلم ؛ الفكرة هى إزاى تكتشف إنك فعلاً لو ابتديت فى الحب ده وكان عظيم جدا جدا هيخلص نفس النهاية السعيدة بتاعة الفيلم , الفكرة فى إنك تكتشف إزاى بتحب وإزاى ممكن تكون ماتعرفش إنك بتحب الشخص دة , الفكرة بتمسكك بالمبادئ اللى انت بقالك كتير اوى بتبنى فيها علشان يوم زى ده .

الفكرة فى إنك تغير كل الاتجاهات وتلخبطها وترجع تركبها تانى إنك تكون انت المسيطر على مشاعرك إنت القادر على إنك تجرح أو تتجرح ولا لا , الفكرة إنك تكون القلب المفكر , مش العقل الجاحد ؛يعنى لازم دماغك وقلبك يتحلفوا معاك وتعيش بيهم هما الاثنين
القصة دى وأى قصة حب من أى نوع .

هيا بقى فيها الحتة دى إن قلبها وعقلها ونفسها متحالفين مع بعض وعشان كدة بيستغربها ناس كتيـر , عشان طبيعى إن اى حد هيتعامل بالمفهوم دة طريقته للحب هتكون مختلفة وغريبة عن عالمنا وواقعنا


معنى الحب اكبر كتير اوى من إن احنا نعقده
ونوصله لكل الحارات السد اللى فى العالم
إن كنت عايز تحب وصل نفسك للإحساس
اللى خدها من إيديها لدنيا هى رسمتها
على فكرة الدنيا دى واقعية جدا
بس تمشى بيها مع الناس بقوانينها
ومحدش يقدر ابدا يسيطر عليها
اوصل لدرجة إنك تتمنى تروح بعيد
وتكون انت كمان مختلف عن وجودك
فى الحياة دى زى مابتتمنى كدة
لحبيبك او لبطل احلامك
حس إنك عايز تطـــــــــــير

وصدقنى جواه احلامك فعلا هتطيـر !!




يلا بقى طبقى الورقة دى , ايوة كدة وروحى حطيها جوه فى الحتة اللى بتخبى فيها ورقك واوعى تفكرى تانى تقريها ..
ده شوية كلام كنت عايزة افضفضه معاكى واقوله عنك من غير حتى ماتسمعيه .. مش إحنا بقينا أصحاب

وبتحـــبينى ؟ :))

كلام فاضى ما يهمكش !!

فى علاقة بين الواحد ونفسه دايما بتكون مختلفة عن علاقته بين الناس , علاقة من نوع مش معروف لإنه مستحيل تعرف العلاقة دى من اى حد , العلاقة دى انت بتعرفها بينك وبين نفسك وبس واعتقد ان علاقتى بنفسى غير علاقتك بنفسك غير علاقتها بنفسها , كل واحد بيختلف فى كل حاجة وبكل شكل ممكن تشوف نفسك فيه . وعلى فكرة كل من قال إنه متصالح مع نفسه وإنه فهمها كويس جدا ده كذاب لإن الوحيد اللى فهمك جدا وفهم نفسك جدا هو ربنا سبحانه وتعالى , انت اه ممكن تكون فهم نفسك بس بنسبة معينة استحالة تعديها !! واللى بيقول بردوا إن علاقته بنفسه حلوة وجميلة ومن غير مشاكل اكبر منافق , لإنه بينافق نفسه .


انا بقى علاقتى بنفسى من نوع غـريـب , يعنى مثلا لما بقعد اتكلم معايا بحس إنى بنى ادمة فيا حاجة كده مختلفة واسئلتى لنفسى مالهاش اخر . فى حاجات كتير بستغربنى فيها وبقول هو انا ليه بعمل كده ؟ طب هو انا ليه نفسى فى كده وعارفة كويس جدا إنى مش هعرف اوصل للحلم ده بس بأوح مع نفسى ., انا ليه بضحك طيب وانا مش عايزة اضحك ؟ !! انا ليه محتاجة حاجات ربنا له حكمة إنه يفضل مخلينى محتاجها علشان يعلمنى حاجة معينة مثلاً .. واسئلة كتيرة تانية إسئلة نفسى بتتنح لما بسألها !! المهم يعنى إنى فى الاخر بتعاقد مع نفسى على إنه مش هعمل إو افكر او اتخيل حاجة انا مش هقدر افسرها بعدين ( بس الطبيعى إنى ماكونش قد المعاهدة ده والطبيعى بردوا إنى مانفذش كل حاجة اتفقت عليها مع نفسى ) . يعنى فى الاخر بلاقى نفسى غـريبة !!


من شوية كنت بضحك بصوت عالى اوى على اى حاجة تضحك وفجأة سكت يمكن حسيت إنى ماينفعش اضحك دلوقتى , بس رجعت ضحكت تانى واستغربت نفسى اوى عارفين ليه ؟! لإنى اكتشفت إن انا كنت حزينة علشان حاجات كتير خلصت وبقت فعل ماضى وبفتكرها علشان اخلى نفسى فى الهم! وبعلى صوت الضحكة علشان اخبى انى افتكرت الحزن ده !! طب ليه . ليه اصلا افتكر حاجة خلصت ومش هعرف اغير فيها علشان احزن فـ ابين لنفسى وابين للى حوليا إن انا كويسة جدا جدا وبالامارةبضحك وده بيخلينى هموت وافرقع من انى بخبى همى عشان الناس وبعمل مجهود رهيب علشان اوصل للضحكة ده مجهود فى كل مرة بيكسرنى وبيضيع منى حاجة حلوة اوى كانت جوايا !! بقولوا ان ضحكتى حلوة .. وانا بقول انا عمرى ماضحكت من قلبى غير مرات قليلة اوى وماعرفش ليه بجبر نفسى اضحك ضحكة بتقتل مع إنى ممكن جدا اخليها طلعة بتحى ! اه والله عادى إنى انسى الماضى وجميل إنى افتكره واقول يارب الحمدلله إنك خلتنى فى المكان ده دلوقتى واضحك لإنه معايا اضحك ضحكة عالية كده مافيهاش هم .. بس هعمل إيه دايما بفشل فى الموضوع ده ودايما بـضحك الناس علشان اضحك واخبى حاجة جوايا , مش بستنى الضحكة واضحكها علشان ابين إنى فرحانة !!


بس انا دايما مفئوسة وعمرى مابعرف اخبى على نفسى حاجة فى وقت اللى بسجد فيه لربنا , عمرى مافكرت اقولوا انا مظلومة لإنه عارف وانا عارفة كويس جدا انى دايما مكشوفة قدامه ومابقدرش احس إنى ينفع اكذب عليه فـابحكيله كل حاجة بمنتهى الصراحة و مابعرفش اكذب عليه لإنى لو كذبت عليه هو بذات هحس إنى مش بنى ادمة طبيعية ..


نفسى اتغـير ونفسى انا ونفسى نكون رأى وفكرة واتفاق ونعمله للأخر
عارفين والله نفسى اتنفس هوا ماحدش يشركنى فيه واحلم حلم ليا لوحدى
نفسى اعرف ليه انا لما بكره بلاقى نفسى مش عارفة اسامح
مع إن انا بسامح بدرجة غريبة جدا لا يمكن ان حد يتخيلها
ونفسى اعرف انا ليه كتير بحب ناس من غيـر مايكون بينا حاجة قوية احبهم بيها
نفسى لما اتكلم مانساش احنا بنتكلم فى إيه وانا جواه النقاش !
نفسى الناس تفهم إن انا مش بيهمنى الحاجات الكبيرة
بس ممكن تفرق معايا حاجات صغيرة وبسيطة اوى


بس اللى نفسى فيه بجد :

إنى اموت وانا عارفة كويس إنى ماسبتش حد مضايق منى
انى قدرت افرح كل حد حوليا بأى حاجة .



كلام فاضى يمكن مايهمش حد ممكن بس هو فارق معايا اوى والفارق معايا اكتر انه يوصل لكل حد قراه ويشوف نفسه فيه ويحاول يبنى حياة بينه وبين نفسه ويكون له احلامه خاصة بعلاقته مع نفسه ..

انا مش عارفة انا كاتبة إيه ومش هقراه تانى لانى مش عايزة كده
ده كلام طلع من جوايا اوى يمكن طلعته عشان انقذ نفسى من
اكتئــاب بيحاول يحوم حوليينى الايام دى
ويمكن عشان ابدا صفحة جديدة تانية مع نفسى
واتغير فعلا واحس إنى انسانة احسن
وماقولش يارب زمان يرجع عشان اغيره
وماسألش ربناونفسى بكلمة " ليـه" !!
كل حاجة زمان حصلت ومش هترجع ومش
هعرف اغير فيها دلوقتى
لكن دلوقتى لسه بيحصل وممكن
اكون فيه افضل ..
وبكرة اكيد هيكون احسن
طول ماانا وثقة إنى
فى يوم هقدر اقرب من
نفســــى اكــتر
وارضى ربنــا
اكتــر واكـتر .