نفسى تشمتى فيا يا أمى

يمكن اتكلمت فـ الموضوع ده قبل كده .. حوالى ثلاث مرات ويمكن تكونوا زهقتوا اصلا من الحوار ده ... ولكن فى شخص جاهل استفذنى بـ رده الغبى فـ قررت اكتب عنه وعنها .. مش رد عليه لان فى ناس ردوا عليه وقامو بالوااجب وقالوا اللى عاوزة اقوله بس ممكن نقول هفضفض شوية مع امى .. بعد حرقت الدم! .. ولا مش من حقى! .. خايفة يكون مابقاش حقى

الاستاذ اللى كنت بتكلم عنه كان كاتب على جروب المجلة اللى مابصش اصلا هى بتهدف لى إيه ..وبيقول إنه زعلان أووى إن الناس متجاهلة لينك على الفيس بوك كان حطه على الوول ضد الجزائر.. فابيقول انه عاوز يصحى امثالنا من اللى احنا فيه .. واننا نعمل حاجة كويسة لبلدنا .. طيب حلو الكلام ده .. مع اننا بنعمل .. بس همشى معاه .. زى ماردوا عليه .. هو النت أو عدد المشتركين لما يزيدوا فى الجروب عندك هيحل المشكلة ولا هيجييب حقنا وكرامة اهالينا اللى اتبعترت!.. انت تعرف فـ كاام جروب طلع بنفس هدف حضرتك من ساعة ماالجزائر عملت كده .. ملايين!.. أتجمعنا ضد الجزائر بس ياحبيبى ده على النت! .. أيه اللى تقدر تعمله! يعنى انت بتقول انا بس عاوزك تعمل دخول وتبعت لاصدقاك .. يعنى زيادة عدد .. تفتكر لو الثمانيين مليون مصرى دوول دخلوا الازمة هتتحل! .. ولا هنحرق دم الجزائريين! .. لو انت فاكر كده .. يبقى انت جاهل .. لان اولا الجزائر مش محتاجة حاجة تخليها تكرهنا ولا ينحرق دمها منا !وألا ماكنتش عملت كده ..ده ردى عليك بقى .. اما امى العزيزة اللى انت اخويا منها وده للاسف طبعا.. فاده ردى عليها..

نفسى اصحى فـ يوم والاقيكِ شمتانة فيا .. علشان عيونى مالاقيتش كمية الزبالة اللى موجودة جنب المستشفى .. ولا مالاقيتش الميكنيكى اللى معلق شغله على سور مدرسة .. نفسى امشى فـ الشارع والاقيكى شمتانة فيا علشان شوارعك نضيفة زى الفل .. ووشوش الناس بتتضحك من غير كذب .. واعرف ادخل جامعة ولا اقدم على شغل من غير واسطة.. غير وسطته سبحانة وتعالى! .. وتشمتى فيا علشان انت مخليا التعليم زى الفل والتلاميذ بيتعلموا حاجة بجد .. مش يستنوا لما يخلصوا دراسة علشان يتعلموا من جديد وجد! نفسى وانا رايحة للبيت ألاقيكى شمتانة فيا علشان مالاقتش الراجل اللى بيبحلق فيا وانا ماشية من جنبه وهو ابن منطقتى .. ولا علشان مافيش شوارع ضلمة اخاف اعدى منها .. ومافيش لفظ بسمعه بيجرح مشاعرى كا بنت من راجل ولا شاب المفروض انه اخويا.. وانى ماخفش اعدى من جنب قهوة بلدى كلها محشيشين!نفسى وانا بفضفض لك قدام النيل تشمتى فيا .. علشان مالاقتش راحته واحشة واقرف ولا لاقيت فيه زبالة .. علشان مالاقيتش واحد بيضحك على سائحة ويقولها الحاجة بعشرة وهى بقرش ..نفسى وانا رايحة لجدودى فى الاهرمات تشمتى فيا .. علشان مالاقيتش كلام على الطوب بيشوه شكله ومنظره أثنين حبيبه فى لحظة كتبوا فيها اسمهم لذكرى الخالدة وهما ولا عارفين قيمته ويمكن كمان مش عارفين ايه ده!!! نفسى وانا واقفة فى اشارة مرور تشمتى فيا .. علشان مالاقتيش ولد صغير خضينى فى العربية علشان قال ايه بيبيع ورد وهو عاوز ياخد فلوس وخلاص .. ولا بنت فى سنى ماشية بعيد بتشحت برضو وهدمها مقطعة ..ولحمها باين للخلق! نفسى تشمتى فيا علشان مافيش ناس تحت خط الفقر .. ومافيش فيكِ عشوائيات !نفسى وانا بسمع قناواتنا الارضية تشمتى فيا .. علشان مالاقيتش ناس بتجامل ولا كلام إعلام متفبرك .. ولا تسخين الجمهور .. ولا ألاقيى ياامى مذيع قدير فيكِ ماعندوش القدرة على الابداع والجهد فى العمل .. الاقيه علشان يسخن الناس كل يوم ينزل نفس الكلام اللى يحرق الدم .. حقيقة! ماشى .. بس لاامتى بس هنفضل نتكلم عنها .. نفسى كمان تشمتى فيا لما نتهان ونجيب حقينا .. نفسى تشمتى فيا لما أصلا ماحدش يقدر يقرب من مصرى جوة وبره بلدهنفسى وانا واقفة بطالب بحقى تشمتى فيا .. ومالاقيش ظابط ولا حد ميرى رايح يزعق لى ولا يضربنى ولا يهين زميلى علشان بنقول لكى فين حقينا اللى المفروض تكونى عارفاه ..نفسى تشمتى فيا لما ألاقى صوتى عالى وانت سمعاه ! نفسى تشمتى فيا لما الاقى واحد فيكى فاهم مش حافظ! واى مصرى على حق فعلا يقول للغلط لا.. نفسى تشمتى فيا لما مالاقيش شابين زى الورد واقفين عند محل ملابس حريمى مستنين الـ "مزة" جوة .. وبيكلموا واحد تالت فى التليفون بيقولوا ليه جبت الحشيش وظبطت البرة والقعدة ولا لأ! نفسى تشمتى فيا لما الاقى ناس عارفة تقرا وتكتب بجد .. وناس مثقفة بجد .. وناس نفسها تغير حاجة فيكِ مش كل هم الشباب دلوقتى يطيروا ويا احلامهم برا !نفسى تشمتى فيا اوى ياامى .. نفسى اجى واقولك انا اسفه وانا عينى مكسورة فى الارض مش راضية تبصلك من خجلها .. نفسى تبقى تشمتى فيا بقى .. نفسى اشوفك احسن بلد فى الدنيا من حقى لانك كنتِ كده زمان ولانك صعب تكونى غير كده !!! .. من حقى اطالب باإنى أعيش زى ماجدودى عاشوا اسياد الكون! كانو بيعلموا العالم ... عارفة يعنى إيه ياامى لما دلوقتى احنا اللى نشحت منهم العلم .. عارفة يعنى إيه واحد زى زويل مايعرفش يخد حقه فى بلده .. فايروح لبلد اجنبية تتبنى قدرته وموهبته وعبقريته .. هو اسماً ابنك لكن فى الحقيقة هو ابن اللى تبناه .. اشمتى فيا وحياه الغاليين .. يارب يارب تشمتى فيا عن قريب .. قبل ماموت وأدفن فى ترابك اللى مش راضية انى ادوس فيه وانتى بالشكل ده ياأمى! .. والله ماببرخم ولا بعيب فيكى .. بس انتِ فعلا مش دايما صح .. نفسى الواد اللى فوق اللى هو قطعا أكبر منى سناً .. يعرف .. إن النت معظمه كلام علـ هوا .. كلام لا بيودى ولا بيجيب .. أسفه ياأمى ودايما أسفة .. لكن نفسى بجد ألاقى عيينيكِ شمتانة فيا وبتقولى شوفتى إن بلدك أعظم بلد فى الدنيا! بلد الامن والامان مابقاش خايفة وانا على فرشتى من أى حرامى ولا قاتل يطلع عليا مع إنى فى الدور التاسع!.. نفسى بدل مادايما بشوف فى عيون أبويا حزن ودايما بيدافع عنك ضدى! .. ضدى انا يا أمى! يرضييكى كده!...

هيا حسن محمد

09/11/30