تفكيرك إيه 3 ..!!

ولا بنخاف مـ الدنيا بحالها لو عاوزين الشمس نطولها نمسك نجم السما بإيدينا والدنيا إن مالت نعدلها .." الدنيا إن مالت نعدلها "..قد إيه الجملة دى دخلت دماغى اه إن مالت الدنيا وعاندت معايا هعدلها مش هديها فرصة تتعوج تانى وتخبط فيا , حتى لو خبطت فيا " بقى عندى مناعة. التحدى حلو برضو .. :)

تأكدت إن الشعب المصرى والحمد لله كله " بهااااااايم" آسفة مش هقدر ماعممش المرة دى بس لما دكتور صيدلى محترم قد الدنيا يبقى بالتخلف والبرود ده .. يبقى الجاهل زى المتعلم .. مفيش دماغ زى " بهااايم " حافظين و بينفذوا وخلاص .. معندهمش خاصية التفكير ولا التقدير حتى .. واضح إن الخاصية دى مـع كل دقيقة جديدة تهددها للانقراااض بيزيــــــــــد ..

خايفة منى .. انا أول مرة أسمع الجملة دى جوايا! , قد إيه مؤلمة , قد إيه بتحاول تهرب منها بس مش بتلاقى غيرها .. فى لحظة بتلاقى نفسك بقيت بنى آدم تانى خااالص .. بنى آدم شال شوية طيبة وحط مكانها شويتين قسيّة ساعتها بخاف أوى منى عليا .. بخاف أزعل واحد وأظلمه .. بخاف أخد فرصة من حد يستحقها .. أنا مش بقسى غير على اللى بيقسى والله " ومش تقل ولا عقلانية" هو بس كوكتيل من حاجات مريت بيها لازم تخلينى كده..

الشَك .. الشك الزيادة مرض , بس مفيش مانع من شوية شك كده , مفيش مانع إننا نخون الناس شوية مفيش مانع إننا مانصدقهمش لان كل كلامهم مش لازم يكون صح .. صح؟!

تعرف إنك وحشتنى أووى , ماعرفش إزاى جات سيرتك وإزاى بسرعة كده هربت من الكلام فيها مع إنى بحبها , ماعرفش إزاى بسرعة قدرت اتخلص من دموعى " يمكن علشان كنت قدام الناس" .. مش عارفة بقى .. بس خليك متأكد إنك حتى لو بعدت عنى وبقيت مستحيل أوصلك علشان انت عنده انا عمرى ماهانساك وأسفة أووى إن دموعى هربت منى .. بس والله اانا بحبك .

الناس .. " ..... " دى شتيمة أه , أصل هاقولكوا حاجة الكلام مالوش فايدة والناس بتحب تتكلم أووى وتحب تجيب سيرة الهوا فلو انا بصيت ده بيقول ايه وده عمال بيجيب فـى سيرتى خير شر هضيع وقت جامد أووى , الناس مش هتيجى تتشفعلى فى وقفتى مش هتقدر حتى تقوله سامحها على كل بلاويها دى .. اللى عاوز يتكلم يتكلم واللى عاوز يقول يقول واللى عاوز يفتكرنى وحشة يفتكر .. مش هازعل على شخص ولا أثنين ولا مية كانو وسط الناس وكانو ممكن يكونوا أصحاب ليا بجد نفضولى علشان " الكلام" .. لانى مـ البداية مش محتاجاهم وماتشرفش بالنوعية اللى بتحب الكلام إنها تكون فـى حياتى وكمان تكون من وسط أصحابى ..

سبحان الله على جمال الطبيعة والمشاعر اللى مش محتاجة تتذوق .. لما تلاقى أم بتضرب عيالها علشان عملوا غلط وبعديها بـ ثانية تلعب معاهم علشان تصالحهم وتسامحهم .. ماشوفتهاش كتير فـى البنى أدمين .. بس شوفتها كتيرأووى فـ الحيوانااااااااات!!!!!!

لكل واحد ماشى فـى الشارع أو فـى محل أو زميل "اهبل" أو أين كان موجود , خاصة " العساكر" مش هعرف أسكت تانى ليكم واحط عينى فـ الارض لما تضايقونى بنظرة ولا بكلمة ولا بلفظ مش محترم .. صدقونى دلوقتى هعرف اوقفكم وبأدب برضو واحترام .. أنا أصلا بدأت فـى ده ..

تعرف انا حسة بحاجة غريبة أووى .. واللى مستغربة له إنها مش من ناحيتى .. وأدى الحوار ماشى ولما نشوف نهايته إيه .. إن شاء الله خير .. وانا حسه إنى مش متضايقة من الحوار " خليك صريح"!!...

بس خلاص كده ..

هيا حسن

010-1-9