ورجعنا تااااااانى

من فترة قريبة اتعرضت لكام صدمة ورا بعض جامدين أووى و الحقيقية كنت مش قد الصدمات دى فى البداية خصوصا فى الوقت ده , ماكنتش عارفة حتى ابكى "بجد" , ماكنتش لسه مستوعبة ولا فاهمة وكنت على طول بسأل نفسى ( هو ليه كده؟ ) ليه كل الصدمات دى ورا بعضها؟ ليه مافيش حاجة واحدة وسطهم تفرح! ليه الناس مستكترة عليا حاجة حلوة أو مستكترة عليا الفرح! مش هقول حالة اكتئاب لان حالة الاكتئاب اصعب من كده بكتير ومش بتكون بالشكل اللى كنت فيه ده! .

المهم بعد اسبوع من عدم الاستيعااب قررت ارمى كل ده ورا دهرى, استنى شوية لما اكون لوحدى بعيد عن الناس " مش كلهم" افكر لوحدى , اناقش الامور الكتير اللى حصلت لى مع نفسى . لما بقيت لوحدى وشيلت كل حاجة من دماغى وفتحت صفحة جديدة جدا وقولت" بسم الله", فكرت بشكل تانى خالص , طيب( هعمل إيه دلوقتى هو إيه الحل يعنى ؟!) . أكيد مش هفضل كده!

الحقيقية كان نفسى اجرب أوى أكون ندلة ورخمة , كان نفسى اشيل شوية طيبة , فى ناس أصلا مش شايفنى جدعة ولا طيبة ولا حنينة وده طبيعى لان مافيش انسان ابدا كويس قدام كل الناس بس مايهمش لان نيتى مع كل الناس سواء كان قريب ولا بعيد بتكون صافية إلا إذا كان الشخص ده مش كويس " مش هكون معاه كويسة" واللى يعرفنى بجد عارف شخصيتى وعارف امتى بقصد ده وامتى لأ

هتقولو الناس بدور إزاى تكون طيبة إزاى انت العكس قول لكم إن الطيبة مش كل حاجة زى ماانتوا فكرين وماينفعش اتنازل عن حاجات فى مقابل الطيبة " الجملة دى ماكنتش مصدقها زمان على فكرة" هى مش حاجة وحشة , بس بجد صعب تتعامل بيها , صعب مثلا تمشى فى الشارع وتعامل اللى ماشى جنبك على انه اخوك! .. اهو انا كنت بتعامل كده للاسف ماكنتش اعرف ان الناس اصلا ماتعرفش يعنى ايه اخواه و يعنى ايه ناس محترمة ..

عمرى ما قصدت اظلم حد ولا ظلمت كتير , انا اتظلمت وظلمت .. بس مش هى دى المشكلة! المشكلة ليه الناس عايشة دايما دور الضحية! .. ليه انا اللى بنت ستين فـ سبعيين .. وهما غلااابة ومساكيين.. ومن هنا قررت .مش هما غلابة! وانا بنت ستيين فـ سبعيين؟!.. ليه امثل بقى انا أعملهم زى ماهما عاوزين يتعملوا .. مش هدى حد أكتر من حجمه , هتهون عليا العشرة لو هى هانت على اللى قصادى , هحترم نفسى واحافظ على كرامتى , مش هكون متسامحة مع اللى مايستهلش , هاأهتم شوية بيا! ..

للاسف مش هعرف اكون طيبة مع اللى مايستهلش طيبتى ولا حتى هدليه مساحة فـ حياتى .. مش هعرف ادوس تانى على نفسى ..

مش هعرف ازعل نفسى علشان" الناس" اللى هما اصلا مايستحقوش يكونو فى حياتى أصل فى منهم كتير كمالة عدد بس , مش هعرف استهبل , مش ناوية احافظ على كرامة حد مش محافظ على كرمتى ولا عامل لها حساب .. أه هبتسم فى وش الكل لانه طابع , بس فى شوية ابتسامات هتكون صفرة

مش هخلى طيبتى تخلينى خاتم فـ صباع حد .. هيبقى دايما طرف الخيط فى علاقاتى مع الناس فـ إيدى أنا بس ( زى ماأمى قالت لى ) .. مش هخاف على زعل اللى مش بيخاف على زعلى , مش هتنزل دمعة على حد مايستهلش ..

أول مرة اكون راضية ومرتاحة أووى عن قسوتى!!!!! وعن قرارى اول مرة اكون هنام من غير ماأفكر فى حاجة هضايقنى ولا تزعجنى حتى فى منامى ... مش هقول الناس هى اللى وصلتنى لكده , بس الدنيا هى اللى عاوزة كده مش لازم تبقى طيب دايما .. لازم تتعلم إزاى توظف الكنز الرهيب اللى ربنا حطوا فيك ده " الطيبة" توظفه للى يستاهل بس ! اللى يستاهل بس ..

الحمد لله انى رجعت تانى لنفسى , والحمد لله ان ضعفى هو نفسه اللى قوانى والحمد لله انى دلوقتى هقدر فعلا اقول كلمة " هااادى" ولا هيفرق معايا حد (زى ماحد كان قالى من فترة)

ملحوظة : فى شوية ناس مابقوش يهمونى خااااالص مايزعلوش لو كبرت دماغى منهم, هيجى يوم ونتكلم ويمكن بكلمى تكرهونى " بس صدقونى هيبقى اكتر كلام طلع منى بصدق أووى الفترة دى لانى مش خايفة على مشاعر اللى مش خايفين عليا" وتأكدوا ان اى حد يهمنى فى الدنيا دى( صعب ادوس له على طرف) وصعب أزعل منه ,بس الكارثة فى اللى فاكر نفسه يهمنى وهو مش فارق معايا :)

اخر حاجة : شكرا ليك أووى , شكرا لانك الانسان الوحيد اللى وقفت جنبى بجد! مش تظهرت انك خايف عليا وكبرت دماغك , شكرا لانى دايما بلاقيك جانبى فى كل حالاتى , شكرا على حاجات كتير وانت عارف كويس انت بتعمل إيه وقيمتك فى حياتى عاملة ازاى , أسفة بجد انى فى يوم شكيت فيك " بس كله من الناس" عمرى ماهفكر فيك تانى بشكل وحش لانك من انضف الناس اللى عرفتها فى حياتى .. يارب نحافظ على الاخوه اللى بينا وياررب اقدر اعمل حاجة من الحاجات اللى بتعملهالى دى كلها , شكرا لانك حسستنى انى مش لوحدى .. ودلوقتى بقى أهلا 2010, ادينى زى ماهتدينى .. خير وشر .. صحاب واعداء , محبة وكره ..مش خايفة مش هخاف .. لان المقدر هيحصل والحمد لله انا فى حالة مستعدة اتقبل منك أى حاجة ومتصدمش .. مستعدة أقف واقولك انا اهو .. :)

هيا حسن

010-1-5