بمناسبة عيد الحب هكتب الموضوع ده يمكن زعلانة لإنها حاجة تقليدية الكل بيتكلم عن الحب وبيكتب عن الحب وانا مابحبش أكون تقليدية بس الموضوع ده كان فى دماغى من فترة ولاقيتنى بكتبه !
مش هتكلم على العلاقات وقول ده صح ودة غلط ولا هتكلم عن اللون الاحمر اللى مالى الدنيا حتى الخط اللى بكتب به حبيت يكون أحمر , الحـب مشاعر و سبب من أسباب أستمرارنا على الارض , الحب حكمة وحاجات كتير , يمكن الحب هو اللى بيقدر يخلى أسرة تعيش بميت جنية فى الشهر وبيخلى أصحاب يبيعوا الدنيا كلها علشان يشوفو بعض مبسوطين , الحب هو اللى بيقوى علاقة البنت بأمها والاب بأبنه من قبل مابيكونو شافوا نور الدنيا والحب هو اللى بيقدر يخلى الحبايب أزواج عايشين فى هنه وسعادة , المحبة فى كل الاديان وفى كل الثقافات والحضارات والعصور , الحب قامت عليه حاجات كتير , هو نعمة وحكمة من الله " عز وجل" فى نفس الوقت
.. بس مش محتاج مننا إننا نحتفل بيه ويبان إن إحنا عندنا إخلاص ووفاء والصفاء جوه قلوبنا فى يوم واحد بس , زى مثلا عيد الام إحنا مش محتاجين نبين لأمهاتنا قد إيه إحنا بنحبهم لإننا عايشين علشان نوفيهم حقهم ونعوضهم عن تعبهم طول السنين دى كلها ولو ماعملناش ده بحب يبقى مش هيوصل لهم وهما طبعا بيعرفو يوصلوا حبهم لينا بسرعة أوى من كلمة خوف علينا تدخل تقتحم قلب الطفل من وهو عنده سنة! ..
حكايتى حكاية مع مظاهر عيد الحب لإنى للأسف مش بحب اللون الاحمر ومش بحب الدباديب الكتير ومش بعرف يكون عندى علم إنى هيجيلى هدايا أصلا , يعنى مثلا لما أحب وحبيبى جابلى هداية فى عيد الحب مش لازم تكون "حمرة" لإنه هيكون عارف إنى بكره اللون الاحمر وبحب الازرق مثلا ولا هيجبلى دباديب لإنى مش من اللى بيناموا وحضنين الدبدوب اللى حبيبها جاب له ليها ,غير إنى مش هعرف أقول كلام مش حساه مش هينفع أكون تقليدية وأقول مثلا " مأقدرش أعيش من غيرك " لإنى لو لقدر الله سبت اللى بحبه هقدر أعيش من غيره لإن الدنيا هتفضل ماشية وماينفعش أوقفها .. ممكن أتأثر وأتعب لكن هعيش من غيره وده علشان الدنيا كده مش علشان هو مش غالى عليا , لكن اعرف ناس بجد حياتها بتتدمر وتفكر فى الانتحار لو حبيبها سابها ! , طب إزاى وليه !! ..مش هقدر أقول له مثلا "انت كل دنيتى " لأن الحقيقة غير كده دنيتى فيها أمى وأبويا وأخواتى وأصحابى وأهلى اللى ماقدرش أبعد عنهم وماقدرش أشيلهم من حياتى علشانه والعكس , إنما ممكن أقوله "ربنا يخليك ليا " أو "بحبك" لإنى فى الوقت ده هكون بجد بطلع الكلام ده من قلبى مش متعلماه من حد ولا هيكون تقليديى بالنسبة له . ..
عيد الحب حالة جميلة جدا وأحساس جميل إننا بنفكر بعض بحبنا , بس أنا من رأيى اللى بيفكر حد بحبه بيبقى شاكك إن اللى قصاده ده بيحبه أصلا , إنما اللى بجد بيحبوا بعض مش مستنيين النهاردة ولا بكرة ولا بعده علشان يقولوا لبعض إحنا بنحب بعض وكل سنة وإحنا حبايب أو أصحاب أو أهل, الحب صعب يكون يوم أوكلام محفوظ بنرددوا الحب من أجمل مشاعر الدنيا ولازم نتخاف عليه وإحنا بنبينوا وإحنا بنحب لازم نخاف ونحافظ على كلمة بحب ومشاعر الحب .
هيا حسن
010-2-14
فتفوتة زي السكر
ردحذفقريتها متأخر شويتين بس لإن بقالي فترة منقطعة
^ـ^
بس بجد
فتفوتة حلوة أوي بطعم أحلى