الاغـانى الدينية فـى مصـر مـش واخدة حقها الايام دى ويـمكن مـش وخدة حقها عـلشان هـى مش بتلمس الواحد زى أغانى زمــان مـافيهاش الكلام المعبر واللى يمس القلب بسرعة ده ويـمكن اللى بيـلمس القلب منها بيـكون بـسبب الوقت اللى نزل فيـه الاغنية زى رمضان مثلاً , مـاانكرش إن الاغـانى الدينية زيـادة اوى الايام دى عـن زمان وده عـشان فـى بـعض الفـنانين بيـعملوا أغانى ديـنية لمجرد إنهم يـشدوا المـستمع ويـعملوا دعاية لنفـسهم , لـكن الفـنان العبقرى نـبيـل خلـف لمـا جيه يكـتب مـامسـكش ورقة وقلم وقـال شويـة أحاسيس جواه تـشد الواحد لـفترة معينة , هو كـتب كلـمات مـن واقع الماضـى كـتب حيـاه عـن حيـاه الرسول عليـه أفضل الصلاة والسلام وجـاب سيرة صـحابة مـش مشهورين ! وده خلاه النـاس تـتشد له أكتر , نـبيل خلف لمـا فكـر يكتب حاجة فـكر إزاى الحاجة دى تـعيش وتتسمع فـى أى وقـت ولما تتسمع فـى أى وقت جسمك كله يتنفض , علشـان كده هو اختـار وليد سعد يـكون الملحن ووليد عرف يطلع وترجم كل الكلام اللى كتبه بالمزيكـا اللى تبـكى بجد وهمـا الاثنين اتفقوا على وائل جسار يظهر ويوضح جمـال الكلمات والاحان بصـوته الدافئ , الاغانى دى حالة يـعيش فـيها كـل واحد بيـحب سيدنا محمد عليه الصلاة والسلام ومـايعرفش يخرج نـفسه مـن الحالة دى .. نبيـل خلف بـاين التعب والمجهود الجبار فـى الاغانى .. مستنية الالبوم الجديد
أمـا عـن : عســل أسود .. فـمحتاج سنين كتـير علشان اقعد أكتب عنه , الفيلم ماسابش أحساس مـاتكلمش عنه ولا وقائع مصرية بحتة وحقائق مؤلمة , خـالد دياب عرف كويس يوصل لكل واحد قاعد يعـنى إيه مصـر وإزاى إحنا مهما زعلنا وبعدنا عن بلدنا فيـها حاجة كده بتشدنا , مصـر هى العسل الاسود اللى مـن بعيد تحس لونه كـئيب ووحش لكـن لمـا تسطعمه تلاقيه مسكر وجميـل .. هى دى بلدى برغم الرشوة والاخلاق الغريبة اللى بنكتسبها دلوقتى وبرغم من الظلم والقهر اللى عايش فيه المصريين ألا إن لسه فيـه روح الروح دى لازم نحافظ عليها ولازم نحافظ جو الدفئ اللى ورثينوا عن جدود جدود جدودنا , وهفضل اقول إن فـيـلم اعسل اسود احسن فـيلم أتعمل فى مصر ولمصـر... حلمـى أنت فنان
بعد الكلام ده مش لاقيه كلام اقوله غـير إن مصـر فيها ناس كتير حلوة , نـاس تخليك لما تقابل حد تقولو بص ده عمـل مصـرى ميه الميـه دى مواهب وعقول مصـرية زى زويل والبرادعى ونبيل خلف و خالد دياب وحلمى وعمر دياب وغيـرهم كتـير مواهب لسه صغيرة وعقول وافكار تقلب الدنيـا , عارفين مشكلتنا حاجة واحدة إننا مش بنقدر بعض , بنحب نحبط بعض , مرة خـالى قـالى عارفيـن مشاريع هندسة والحاجات اللى انتوا بتتعبوا فيها دى هنا بعد كـام سنة بيرجعوا الاجانب للجامعات دى ويخدوهاوينسبوها لنفسهم وانتوا فاكرين إن دى حاجة حلوة ؟!..
مع إنى مـن فـترة كنت كتبت عن مصر وقلت إنها بلد مش هتتغير وإن اللى فيها ناس عقولها ضايعة , لكن لو حتى لنسبة قليلة هقول إن المواهب دى لازم تحافظ على نفسها والعقول دى لازم تعرف إن بيها هتتغير العشوائية فـى الحيـاه المصرية , مش بس فى الفن .. لو كل واحد حافظ على عقله وحولنا احنا بنا وبين بعضنا نرفع شوية من معنوياتنا الدنيا هتبقى اسهل , احنا عندنا ميت احمد حلمى وألف نبيل خلف ومليون خالد دياب .. ولازم يطلعوا ويثبتوا للعالم إن إحنا بنتغير !!
هـيا حسـن
0 comments:
إرسال تعليق