يادى النيلة

يه الليـلة الطويلة دى ,, كـل ده والوقت زى مـا يـكون واقف مش بـيمشى و إيه الزهق دإ مـافيش حاجة تتعمل كالعادة , هفضل كده قاعدة على النت لحد ما يجيلى نوم , ده إن جيه !!


أقوم أشغل الـ اف ام طيب ! يـادى النيلة مـا دلوقتى السـاعة أربعة وفى الوقت ده بيجيبوا أغانى دينية وانا بقى بصراحة حفظتها وزهقت منها وفقدت طعمها عندى خلاص . بس أهى حـاجة تكسر الملل والصمت ده وخلاص ! ..


نفـس القاعدة الا إنسـانية ونفس الكأبة اللى أعتدت عليها ومن كتر مابتجى كل يوم بقينا انا وهى أصحاب ,, وكـالعادة يـجى ميـت بـنى أدم قاعد على النت والكل مش بيتكلم ! كل واحد بيشوف مصلحته فيـن ويدوس بقى ويـولع الباقى عادى يعنى وهزعل ليه ماانا ساعات بعمل كده وركزوا بقى على ساعات دى يعنى مش دايماً ومش كتير ببقى قصدها لكن لما يكون عندى يجى 300 بنى أدم ومنهم 100 قاعدين وكلهم المفروض " أصدقائى " وكل واحد فيهم مكبر ,, اقول معلش وأسال عليهم يمكن لما اسال هيسألوا وأسال مرة وأتنين وعشرة ! لأ كده فى حاجة مش تمام ,, ليـه مش بيكلمونى الناس دى ! انا عملت حاجة وحتى لو ماعملتش إيكش تولع انا هحرق دمى ليه انا بعمل الناس بما يرضى الله سبحانه وتعالى فـاكس بقـى مش هستنى كلمة من حد.


طيب بقى فكنى من الموضوع ده انا هسرح شوية واقعد افكر ,, أما اقوم اقفل الـ اف ام علشان افكر بهدوء كده وكسـر الصمت الغريب ده .. هو انا لوحدى كده ليه ! ليه دايماً فى ناس فى حياتى اه بس ليها وقت وبتزهق وبتمشى ياانا بزهق وبمشى ,, هو ده حال الدنيا يعنى ! .. حال الدنيا إن يكون فيـه قديم وناس فاتت علينا وخلص وقتها فى حياتنا لكـن كمان المفروض يكون فيه جديد ! اه والله ناس جديدة جميلة تفضل فى حياتنا تنسينا القديم ودور الدايرة ناس تيجى وناس تروح ,, بس يفضل فيه ناس مش العادى إنه مايكونش فيه ! طب والله انا عمر ماربنا ادانى ونس وبعدت عنه وهو يعنى فى عاقل ربنا يبعد عنه الوحدة ويكره ده !


لا لأ هقلبها غم ولا إيه سيبنى بقى من الهم والغم دول,,انا افكر فى زكرى حلوة كنت ومازالت بضحك لما افتكرها ,,وهى ليه حتى الزكريات الحلوة قليلة فى حياتى وكل حاجة فيها الحروف دى ح ل و ة ,, بتنتهى نهاية سيئة ,, امتى هلاقى حاجة صافية كده مافيهاش حاجة وحشة فى الماضى او فى الحاضر !


دماغى شغالة ويمكن زهقت من كتر ماهى بتشتغل وعمالة تفكر ,, بكرة احسن ولا اوحش بكرة فى ليا مستقبل هنا !,, بكرة هعرف احقق حاجة ,, ابقى مأثرة فى بلدى وهل ياترى بعد بكرة هيتعملى تمثال فى ميدان عام وهيدرسونى فى المدارس ولا هتفضل بلدى بلد شهادات وبلد كوسه وبلد فيها الزبالة اكتر من البنى ادمين ,, مش مشكلتك ولا مشكلتهم إنى عايزة بلدى احسن وانى حزينة فعلاً إنى بفكر امشى منها عشان اعرف افيدها وحتى لومشيت هبقى برا متهانة عشان انا مصرية وبرا المصرى متهان ياأخى دى كلمة مصرى فى السعودية إهانة!


بس بس كفاية كأبة هى الليلة دى مش ناوية تعدى ولا إيه ..ولا انا مش هنام بقى ولا إيه كفاية كلام خلينى ألحق أروح انام او حتى اقعد على السرير علشان استقبل الكابوس اللى هيجيلى المره دى واحول على قد مااقدر انام بسرعة علشان بقىيت اخاف انام من كتر الكوابيس اللى مابتخلصش !



وده حوار ليلة من الليالى اللى بتعدى عليا وانا زهقانة ولوحدى :)